富達「積金智庫」系列 - 債券基金

  • 2015年1月14日
    查閱內容全文

    大家好,歡迎您收睇新一集富達「積金智庫」系列。

    我係 MPF 特務阿James。今日任務嘅行動代號係 Bond 。我要為大家偵查債券基金嘅底細。

    首先,到底乜嘢係「債券基金」呢?

    所謂「債券基金」,主要係投資於由政府、公營機構、銀行、商業機構或者多邊

    國家機構所發行嘅債券或債務工具。藉此爭取穩定收益同埋長期嘅資本增值。

    佢嘅回報主要來自債券穩定嘅利息收入,或者喺市場上買賣債券所帶嚟嘅利潤。

    呢類基金所投資嘅債券必須符合強積金法例規定嘅最低信貸評級或上市規定。

    喺香港強積金市場常見嘅債券基金主要分為三大類:

    1) 香港債券基金 – 主要投資喺由香港政府、其他政府或銀行等機構所發出,並以港元結算嘅債券。

    2) 環球債券基金 – 主要投資於全球債券市場,例如由世界各地政府或政府認可機構所發行嘅債券。

    3) 人民幣債券基金 – 呢類基金主要投資喺中國大陸境外發行或分銷嘅人民幣計價債務工具及貨幣市場工具,俗稱為「點心債券」。無論係以上邊一種,投資債券一般都屬於投資風險較低嘅基金,但仍然存有一定風險。

    咁有啲咩潛在風險會影響債券基金嘅價格呢?

    1) 發行者嘅信貸評級改變 – 如果基金所投資嘅債券信貸評級被調低,債券價格通常會下跌,有機會導致基金價格下跌。

    2) 利率波動 – 當利率上升嘅時候,可能令債券價格下調,基金價格亦有機會因而下跌。

    3) 匯率波動 – 如果基金投資喺以外幣作為計價貨幣嘅債券,當該外幣貶值時,基金價格都會下跌。

    以上三點,加上新興市場、政治、經濟、社會因素等等,都有機會對債券業績造成影響。

    債券基金適合中度保守嘅成員,佢地一般願意承擔嘅風險程度較低,又或者係年齡較成熟嘅成員,希望獲得中期至長期較平穩嘅回報 。

    大家喺作出任何投資決定前,應先了解自己可承受風險嘅程度、投資目標以及人生階段嘅需要,咁就自然能夠作出適合自己嘅投資決定啦。

    想知道更多強積金資訊,可以 click 入富達網站。如果有任何疑問,歡迎您致電富達投資熱線。